سيبونى يا اهلى ويا ناسى
اتكلم واقول المآسى
ضلمة وعتمة وراح الراسى
اصل السكة كانت واحدة
وشمس نهارها كانت واضحة
جم خفافيش الليل العتمة
جم واتلموا وعملو المجلس
قالوا النور بيزغلل عينا
لازم تمشى الناس فى الضلمة
واما الخلق تتوه فى الضلمة؟
الو بسيطة نعمل نصبة
محنا ملوك الليل الضلمة
بعد ايام فى الانباء
احنا ملوك الليل الضلمة قد قررنا
يشترى كل مواطن شمعة
والشمعة يلزمها فانوس
اصل الدولة عايزة فلوس
اصل الشمعة ويا فانوس
واجب قومى
كل اهالى الليل الضلمة
جابوا الشمعة ويا فانوس
بس الخيبة طلع الشمع
ما بينورش ناقص الفتلة
والفوانيس يلزمها الشمعة
علشان عتمة ليل الضلمة
قال الناس
مالنا ومال الليل الضلمة
ولا الشمعة وفين الفتلة
جه خفاش الليل الاكبر
ولقا الناس واقفة ومجتمعة
قال ليه الزحمة وليه اللمة
قال الناس خدتو فلوسنا
وخدنا فانوس وياه شمعة
وفين المشكل
بس النصبة
طلع الشمع ما بينورش
من غير فتلة فين الفتلة
مين سرق الفتلة
قال فى الحال يجرى البحث
قال الناس
امسكوا يلا حرامى الفتلة
بعد ايام جه الاعلام
اسكت واسمع دا نبأ هام
يعلن مجلس خفافيش الضلمة
ما هو ات
ان حرامى الفتلة عرفناه
بس هرب وفلوسكم وياه
وعليه لحين القبض عليه
يشترى كل مواطن شمعة
قال الناس يادى الحوسة
فليلكو الضلمة
تانى الشمعة وتانى الفتلة
مالها الشمس ومالو النور
وليه الضلمة وليه الشمعة
!!!دا سؤال هام
عايز رد
ليست هناك تعليقات:
إرسال تعليق