فينه زمان ايام وليالى
كانت اللمة فيه بتحلالى
ويا الصحبة وبالى الخالى
فينه زمان وآه يا ليالى
ليلى زمان ويا اصحابى
دا بيحكيلى وانا بشكيله
ودابيهيص ودا بيهجص
ودا بينكت ودا متبكت
اصل البت بتاعتو اتخطبت
ودا بيفكر ازاى يوصل
ازاى يخرج برة القمقم
اللى فقلب العتمة اتخبى
كنا زمان يومنا طويل
بس قصير
الف ومليون الف حكاية
بين الشغل وبين الشلة
وبين المشى وبين القهوة
نمشى لحد الرجل ماتتعب
بنقول ايه اى كلام اى حديت
كنا صغار والصحة حديد
اه يا زمان واشكى لمين
فينها الشلة ويا الليل
كنا زمان ملناش ظابط
ولا فيه رابط ولا فيه بكرة
يالا لمصر ولا البحر
اه على كوبرى قصر النيل
فليلة صيف ولا الكورنيش
ولا عجوز قاعد عالقهوة
فى الجمالية شرب القهوة
وياسجارة راح متسلطن
راح كدا دندن والقاعدين
راحوا واقفين
وكانهم كدا متفقين
غنى احلى اغانى فريد
ودا بسجارة ودا بالقهوة
ودى تبقى قعدة المصريين
والاالقاعدة زمان فى القمرة
فوق الرملة كدا عالشط
كنت زمان سايح رحال
بين الناس
كانت الناس لما بتفرح بتفرحنى
ولما اشوف عيل بيعيط
عينى تغرغر
كنت انا ابيض كنت زمان
لما اشوف واحد مهموم
احسبه همى اه يا زمان
كنا كتير يجى كام مليون
بس قلوبنا كانت وحدة
همنا واحد قولةاه
من واحد منا
تخلى الكل يجرو عليه
اه يا سنين عدت فقلوبنا
خلتنى ابكى واقول يازمان
اه لو ترجع زى زمان
ليست هناك تعليقات:
إرسال تعليق